知名投資大師、建立天下第一倉嘅東尼（Tony Measor），喺股壇上無人不識，搵銀無數，愛女Mara Measor卻走上歌唱事業，反應仲相當熱烈。上星期五Mara唱佢第一隻個人大碟，仲開咗個發佈會，華華去睇過，現場迫滿晒人，似乎Mara嘅知名度已經有番咁上下。
現場約有接近100人，媽媽Jenny當然有嚟捧場啦，對於愛女踏上呢條咁難行嘅路，Jenny坦言：「最緊要個女開心」，仲話一家人非常親密。Mara話，佢寫歌嘅靈感好多都係源自屋企人同爸爸，希望用音樂令人更加珍惜身邊嘅人同事。Mara中學畢業後去咗埃塞俄比亞住咗一年，見到當地人冇錢但非常開心；之後去到紐約讀大學，反而見到城市人好容易因為生活而忽略身邊嘅人同事，睇嘢好容易變窄。
就喺佢剛畢業之際，爸爸中風入院，Mara話爸爸咁辛苦搵錢養佢哋，就係想佢哋四兄弟姊妹可以有更多空間追尋夢想，而佢亦好好利用咗呢個機會去尋夢，所以毅然走上唱作歌手之路，至今兩年啦。

創作緊首隻廣東歌

一家人有幾親密？原來Mara每次寫好歌都會畀屋企人試聽，屋企人亦好真心咁唔係次次話好聽，所以每當家人話鍾意首歌，Mara就非常滿足。Mara仲話，一路唱開英文歌嘅佢嚟緊仲會試寫第一首廣東歌，仲完成咗半首啦。
有冇喺爸爸身上學番一招半式投資或者理財呢？Mara就話冇啦，但學到爸爸要好好利用資源做自己想做嘅嘢，更加學識好好珍惜自己擁有嘅嘢。
至於大家好關心嘅東尼近況，Jenny同華華講，雖然東尼四次走近鬼門關，但最近狀況穩定咗好多，出事後仲令一家人建立更好關係，識得互相扶持，所以東尼嘅擁躉唔使太擔心啦。

李華華
mailto:[email protected]

足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24