臨近年尾，財經界有唔少喜事，好似之前提過金管局副總裁彭醒棠嚟緊星期日娶新抱，噚日又收到風，靚佬股評人、君陽證券行政總裁鄧聲興（Kenny）啱啱做咗爸爸，仲要一嚟就龍鳳胎，好事成雙，恭喜晒。
Kenny嘅一對龍鳳胎啱啱喺上星期六出世，Kenny話，BB分別重4磅幾，係家姐同細佬，佢家族冇乜親戚係孖仔、孖女，佢都覺得有一對龍鳳胎相當之喜出望外。

黃德几：千金似媽咪

四字頭嘅Kenny跟太太Maggie喺2011年初結婚，結婚4、5年，都係時候有小朋友㗎喇。華華噚日打電話恭喜佢時，佢仲喺醫院陪緊太太同BB，佢話呢幾日好忙，應該會為BB擺百日宴，不過未得閒諗住，BB名都會搵風水師傅幫手改。
身為Kenny好友嘅股評人黃德几（Dickie）星期日已經第一時間去咗醫院探BB，仲大讚Kenny千金好似媽咪咁靚，笑住話「好彩喇，如果似爸爸就弊啦」。
Dickie𠵱家育有一仔一女，見到好友嘅BB出世，又會唔會心郁想追多個呢？佢就話，自己能湊夠一個「好」字已經心滿意足，唔打算再追，但真係羨慕Kenny咁幸運可以「一次過搞掂」咁話。
已經有孫抱嘅陳永陸（陸叔）當然替Kenny高興，佢話「見到Kenny都要講句恭喜」，佢打算等一對BB出院先至走去探佢哋。

李華華
mailto:[email protected]