社民連今晚慶祝成立9周年晚宴，一如既往喺旺角倫敦大酒樓大排筵席，一共筵開53圍，今年重頭戲係文化監暴成員、歌手黃耀明唱歌，並由社民連馬雲祺負責做結他手。明哥揀咗甄妮嘅《奮鬥》一曲，明哥話，知道董建華攞咗呢首歌嚟做佢嘅團結香港基金廣告歌，所以要搶番首歌：「我好嬲，我要攞番呢首歌嘅話語權。」明哥一路唱，台下當然high啦，完咗不斷叫Encore。有人即席叫學民女神周庭上台唱歌，但周庭就怕醜，話自己唔識唱喎。

文化監暴另一成員兼音樂創作人周博賢應承社民連，待社民連明年創立十周年，送首黨歌畀社記。

啱啱畀人包圍嘅社民連主席「長毛」梁國雄話，包圍事件令人反胃，叫大家唔好再提呢件事，對於別人對佢嘅質疑，長毛話，認識一個人要三年，唔係一兩日嘅事。

晚宴梗係唔少得拍賣「揼心口」環節，公民黨主席余若薇嘅「不在真話中崛起，就在沉默中滅亡」墨寶，以12,800元成交，政治漫畫家馬龍同尊子亦同捐出作品，幫社記籌得幾萬蚊。