上個星期幾乎所有新股「冚旗」，咪以為咁就嚇窒IPOmarket，排緊隊打算上市嘅仍然大有人在，其中食肆呢個sector聽聞最蠢蠢欲動，已知嘅有一間連鎖式酒樓同埋一間連鎖式名牌飯店，名就唔開得，只可以話俾大家知，一間係食海鮮嘅，一間就以燒豬馳名，不過如果問勝曉嵐，最應該上市嘅，在下會揀太興（尤其係當翠華都上到市）。

點解會話太興應該上市呢？當然唔係因為EricKwok個廣告，而係正當唔少冇料嘅股都過關上到市，以太興嘅基礎因素到依家仲keep得幾好，冇理由一隻咁具實力嘅股唔上市。所謂基礎因素，就係燒味crossover嗰杯奶茶！唔係亂噏，試想想，燒味，係香港嘅特色，燒味飯搭杯凍奶茶／凍檸茶，係好多香港人日常生活不可或缺嘅一部份，唔係話香港無其他燒味茶餐廳，但呢兩樣嘢一齊叫嘅時候，都係太興keep到個水準。

（利伸：在下並唔認識太興老闆、任何管理層、入去幫襯同大家一樣要俾足錢，亦要喺門口攞飛仔等位）

值得一提嘅係，太興上個月搞AnnualDinner，作為茶仔竟然勁有霸氣地當日提早休市。如果佢真係如勝曉嵐所願上市，睇怕以後都冇早收呢支歌仔唱。

by勝曉嵐@堆填區
http//www.facebook.com/winbigwok