大台最近套劇《一屋老友記》搵咗滕麗名做女主角，佢腳頭好帶挈收視之餘，一班高登仔仲話要捧到佢做視后。人紅自然是非多，噚日有報道話滕麗名嘅同劇對手胡定欣就唔多滿意，關係非常惡劣，幾個月以嚟都只係試過喺一次宣傳活動上見過面。（相關新聞： http://bit.ly/2afngol ）

大台今次反應非常快，套劇今日喺將軍澳舉行活動，出席演員唔只有阿滕同定欣，仲有35歲童顏張彥博同「長腳蟹」呂慧儀。阿滕同定欣兩個喺生活上表現友好，手拖手仲有講有笑，佢哋仲表示，如果不和傳聞可以令收視上升都唔會介意。

活動後阿滕同定欣一齊接受訪問，問佢哋係咪破冰？定欣兜個圈否認：「喺現場都唔見有冰。」仲話幾個月唔見人，係因為離開咗香港先缺席。講到兩人表示不和可能令收視上升，阿滕講笑話要諗計繼續「不和」，可能阿滕轉數快，仲即刻有意冇意示範「射哩眼」，點望都唔望向定欣個邊。

講到阿滕受歡迎啲，定欣有冇唔開心？定欣即刻反問點解要唔開心：「我好戥佢開心，亦戥整個劇組開心，有份拍就已經是有收穫，大家都有自己嘅戲份，冇搶。」最後兩人話之後會擺和頭酒請食飯。 

至於張彥博就否認曾經同裕美拍拖，解釋影婚紗相只係工作，認咗十幾年，感覺似兄弟，仲話冇諗過同裕美發展。

其實張彥博係咪失憶？喺2011年2月，佢同裕美出席教會活動「Loveis.....Concert2011」，甜蜜拍照，又大談婚事及性事。當時裕美話婚期未定，張彥博就甜絲絲謂：「追咗佢(裕美)好耐，05年首次見面，佢對我一直都忽冷忽熱。」

唔通當時有人講大話？