韓國男神宋仲基自從《太陽的後裔》爆紅後，喺內地紅到發紫，唔少粉絲都自誇係「宋太太」，亦視宋仲基為老公仔，可見Oppa喺內地幾受歡迎。

而宋仲基因為爆紅，所以廣告亦接過不停，當中特別喺內地廣告更加多到數唔晒，好似佢之前為內地手機品牌vivo做代言人，仲拍咗唔少硬照，廣告商就好大手筆，喺地鐵車廂鋪天蓋地賣廣告，當中有粉絲就喺長沙地鐵車廂內狂賣廣告，無論車門或是地上都佈滿咗宋仲基嘅廣告硬照。

本身廣告商賣廣告唔係問題，不過粉絲見到Oppa靚仔樣被人任踩時即刻好嬲豬，覺得廣告商完全唔尊重代言人，有粉絲更強烈要求廣告商應該要道歉，仲放狠話留言話：「不立即撤掉這個廣告就等倒閉吧！老婆們這樣對老公你們不憤怒嗎？」

而vivo今日亦即喺微博就事件致歉，承認處事失當。

另外，宋仲基因為《太陽》而成為大紅人，據了解佢已接拍了超過20個廣告，當中韓國方面就有十多個廣告，內地方面亦都有成6個廣告，有指佢短短半年已狂賺成300億韓圜(約2億100萬港元)，認真誇張。