容祖兒、鄭希怡（Yumiko）同Twins聯手賣二手衫，今日起連續兩星期喺銅鑼灣皇室堡開舖，祖兒同Twins將收益全數撥捐容祖兒慈善基金，Yumiko就捐去女兒梁浸浸嘅教育基金。

祖兒話今次義賣準備咗大概一千件物品，笑話太匆忙有啲鞋連鞋墊都未拎走。蔡卓妍同鍾欣潼話好多衫已放入倉，今次主要義賣手袋同鞋，佢哋話演唱會嘅歌衫同出席頒獎禮特別訂造嘅衫就唔捨得賣。Yumiko連梁浸浸嘅衫都拎出黎，仲講笑話係鎮店之寶，而梁浸浸喺現場都成日賣萌。(詳見： http://bit.ly/2hhTqmJ )

祖兒自言睇過一本書有感而發再搞二手衫義賣，佢話:「人生好多嘢都係身外物，拎得起放得低，做藝人唔可以將衫着好多次，依家又可以廷續到物品用處，一舉三得。」

祖兒又話價錢唔會標得太高，有啲一百元一件，仲講笑話深圳東門都做唔到呢啲價。祖兒之前一次賣二手衫得六位數字，問佢會唔會想今次再賣得多啲錢？佢話:「好似歡樂滿東華咁樣。」至放男友劉浩龍冇提供衫，祖兒話今次先做女裝，反應好先諗搞男裝。