葉家寶今晚出席「仁美清叙」嘅新春團拜，早前傳亞視同「仁美清叙」不和，搞到新嗰班亞姐冇得加入去做慈善活動，不過今日就「破冰」，葉家寶帶住應屆亞姐撐場。

問佢今日係咪破冰?佢就笑騎騎話:「之前都唔係好結冰，唔係結得好犀利，應該溶化啦，今日帶亞姐嚟撐。」因乜咩事溶化呢?佢話:「一黎珊姐誠意拳拳邀請，二嚟我係仁美嘅顧問，都想做返啲嘢，日後都會鼓勵亞姐出席慈善活動。」問佢之前咩事搞成咁，佢話:「種種原因啦，主要亞姐檔期問題，佢哋又未必留喺香港。」佢又表示想擴大招募。

講到亞視財困但又擢升六高層?葉家寶話:「公司一直都有人離職升職同加人，亦都有其他同事，除咗呢幾位都有同事升職。」但係冇薪加?佢就笑笑口話:「呢個時間就要捱下義氣，之後一定會追加返。」咁升職呢個行徑代表咩?佢話升職都係一種仕氣鼓勵。

再問佢每次出現都要答嘅欠薪問題，佢話過往嘅薪金冇再欠，不過2月份要再去評估，話喺勞工法例7日內出糧嘅機會好高，但要明日先有公佈比大家，亞視上個月俾咗第一部份牌費，第二部份就要3月18交，會繼續努力解決，因為要嘅錢都好多，佢自己嚟講次序絛會發放員工薪金優先。

出席完個活動冇耐，葉家寶就更新自己個博客話:「各界很關心我們有關發薪的事情，這裡可以跟大家說一下，經過我和同事們盡最大努力後，亦得到亞視董事會的同意及支持，我評估現時的情況，如果一切順利，幾筆收入可於明天到帳的話，二月份的員工薪金將可於後天（6日）向所有同事們發放。」

其實出到就係出到，葉家寶次次對外講「好大機會」「盡最大努力」「如果一切順利」呢啲說話已經好多次，究竟出定唔出呀?