趙哲妤未婚懷孕，早前臨盆在即，仍飛去馬來西亞工作，點知返港前一晚胎動被送去醫院，令本來預產期喺下月9日，提早喺今個月19日搶閘過聖誕。啱啱生咗B女，初為人母嘅趙哲妤噚日以短訊回覆：「BB出咗世啦！多謝聖誕老人送了份29年來最好的禮物給我，英文名改做Natalie，取其意聖誕出生的女孩。」
唔知係咪早產關係，Natalie體重只有約4.3磅，趙哲妤話：「B女是個迷你B，醫生說除了新生B常見的黃疸外，一切很健康，3天就出咗院。我都成功順產，因為我懷孕時做了很多產前運動及瑜伽，雖是第一胎，生產過程亦歷經了10級陣痛，但很感恩，開度數很快，6小時就成功順產了，母女平安。」

會餵母乳

生完B第二日，趙哲妤已經可以落床，佢話：「現在基本上都係有女萬事足，不過比想像中忙好多、難好多，沒想像中易學。暫定全母乳媽媽為目標而進發，𠵱家努力學餵奶掃風換片洗澡，希望能生手變熟手。」
許嘉浩（Karl）噚日做網上直播節目提到好友趙哲妤，佢話：「佢作動嗰陣話想返香港生，不過趕唔切，𠵱家租咗屋，至少要3、4個月先可以返嚟。」問到趙哲妤男友有冇去當地？Karl話暫時未。
撰文：馮仁昭