阿董上京見胡溫，見得多，亦好似山貝河嗰條鱷魚咁，慢慢亦冇乜驚喜，因為香港人知道，想阿董落台，就好似想條鱷魚自動消失咁，根本冇可能。所以香港人漸漸習慣咗條鱷魚，佢有佢潛水曬太陽，香港人有香港人自求多福，無論係澳洲佬定鱷魚釗，都吹條鱷魚唔脹──鬼叫佢皮厚、腦退化，兼係爬蟲類動物？

對白似鱷魚先生
今次阿董上京，胡溫發表嗰兩句對白，亦愈嚟愈似澳洲鱷魚先生嘅台詞。阿溫話：一國兩制係一項創舉，香港同胞要珍惜六年來之不易嘅成績。阿溫講說話，「一話兩聽」；冇錯，六年以來，香港人7.1「自遊行」，盡顯民主力量，迫到葉劉、阿松、太空成等相繼落台，呢六年來嘅成績，的確十分驕人，解放軍冇出營屠城，亦來之不易，香港人應該聽取溫總嘅勉勵，以過去六年嘅覺醒為基礎，爭取更大嘅成績。
喺呢方面，阿董亦有智慧性嘅補充，佢話香港嘅命運，掌握係香港人之手。冇錯嘞，阿董講得啱。五十萬人7.1自遊行，就係香港人自我掌握命運嘅驕人成就，以後，爭取○七直選特首，廢除區議會委任制，港人會陸續掌握命運嘅嘞，請阿董放心。
阿董每次上京，都要鼓起好大勇氣，因為聽住胡溫喺自己面前狂讚何厚鏵，跟住就話自己嘅「工作」係「唔容易」，即係身為大婆，睇住自己條佬，當住賓客面，猛讚個二奶點樣年輕貌美好身材，然後就黑起塊面話：我呢件黃面婆，日日喺廚房斬柴洗衫，湊大五個細路，含辛茹苦，真係好唔容易。身為女人，聽到啲咁說話，又點會唔用條手巾掩住塊面，衝入個廚房閂埋門，喺水缸𢳂一殼水，照吓個樣，摸摸自己塊面，跟住就係咁飲泣？