話咁快又嚟到年尾，唔知2017年大家喺年頭嘅目標又達成咗幾多個呢？嚟到12月，大家最期待嘅都莫過於聖誕節，今年聖誕《蘋果》娛樂直播節目《今日ENT》搵嚟薛凱琪同大家傾吓偈，一齊開心渡過平安夜。

問到薛凱琪一提聖誕節會諗起啲咩？佢就話：「聖誕節係最開心嘅日子，仲開心過生日，聖誕節好似係大家都一齊生日咁，互相送禮物，又有燈飾咁，好浪漫。」薛凱琪仲話聖誕節大家一班朋友有個約定就係要拎啲大家唔太需要而又用得嘅嘢交換禮物，結果就緊要拎到好多奇奇怪怪嘅禮物啦，佢話：「試過收到三鞭酒、鎚仔呢啲完全冇用嘅嘢。」

今年薛凱琪除咗嚟到《蘋果》渡過之外，仲有一件事對佢嚟講好緊要，就係終於完成約定推出國語大碟《你我之間》，佢話：「其實早喺六年前已經對大家承諾我會再出國語碟，有好多原因點解o依家先出，第一就係我嘅監製係方大同，我同佢都好忙一路約唔到時間，第二就係我又唔肯放棄拍戲，一年大約拍兩套，要做宣傳，我又唔肯放棄做live、唔肯放棄做廣東歌，其實中間我聲帶傷咗年半，我又一路做嘢所以復原得慢好多。」

講到今次專輯，薛凱琪話：「正正係因為呢隻碟錄咗四年，所以我覺得入面有一個好特別嘅故事，今次隻碟有九首歌，其實全部都係講緊一個故事，我成日覺得當你愛一個人嘅時候佢會令到你有好多唔同嘅感覺，有開心嘅情歌、悲慘嘅情歌、甜蜜嘅、鬱結嘅、憤怒嘅，所以我覺得唔應該用一隻歌代表全部嘅感情，今次《你我之間》就係講緊某一個男仔令到個女仔有晒呢九首歌嘅感覺。」

難得聖誕節搵到薛凱琪做直播，緊係要叫佢唱番首聖誕歌應吓節啦，今次薛凱琪就揀咗首《White Christmas》祝大家聖誕快樂，薛凱琪仲講到最難忘嘅聖誕節就係同媽咪去芬蘭睇北極光，點知睇唔成最尾成程得個凍字，啱啱到步時仲唔見咗行季箱，搞到成程都要著媽咪嘅內衣褲，仲因為唔想啲鹿辛苦而唔坐鹿車自己徒步喺雪地行去效外睇極光。

今年聖誕節正日薛凱琪會喺工作中渡過，問到佢有咩願望？佢就話：「我覺得願望唔可以亂許，因為你會浪費咗個機會，如果一定要許我希望全世界嘅人都可以過聖誕節。」

Makeup: Frances Ho @ Jessica Chan Make-up Workshop
Hair: Jo Lam @ Muse Hair
Outfit: SPIRITUNUS

更多娛聞，喺晒《娛果》
http://fb.com/appledailyent