今年係國學大師饒宗頤90歲華誕，香港大學噚日舉行饒宗頤書畫展揭幕禮，話自己一直好欣賞饒公嘅前特首夫人董趙洪娉亦嚟握握手。饒公身穿薄身紅色棉衲出席，佢話近年鍾意紅色，因為寓意吉祥。
今次畫展全數屬饒公手筆，約有70幅，大部份係佢今年作品，證明佢仍然壯健。饒公對部份作品幾滿意，其中一幅彩繪係《井上菩薩》，另一幅《三危山掠影》就係饒公自創嘅中國山水畫「西北宗」說嘅實踐作品之一。
饒公對中國西北文化研究經年，對該區獨特山川形勢及風光深有體會，今年終用佢嘅獨特蒼勁老辣筆勢嚟繪畫西北風貌，同以往臨摹方法分別好大，相比以前少咗化墨，多咗西北區亁涸嘅質感。饒公好謙虛，話今次擺啲畫出嚟係博大家批評，不過亦希望有人跟隨佢嘅「西北宗」畫法，即係話希望可以流傳落去啦。