由今個星期起，《樓‧搜》會轉場至wONdEr，還請大家繼續支持。過去呢兩星期，我都好多嘢wonder，我wonder點解啲新盤個個賣得咁貴但鋪鋪清；我wonder政府開徵新樓空置稅有冇用；我wonder點解咁多有米慈父慈母買樓畀仔女；最大wonder當然係「為何這些wonderful父母不是我的」囉！

喺售樓處，鏡頭前梗係父母慈、子女孝，笑聲笑聲滿載溫馨喇！斷估買得起新盤又抽得到咁偉大嘅事，肯接受訪問多數都係開開心心，唔通喺記者面前大鬧啲仔女唔生性咩？但鏡頭後，係咪每個靠父母幹嘅上車故事都咁開心咁勵志？又同大家講吓故喇～

愛自由囝囝：慈母擔心阿仔fing晒份糧，於是出首期夾佢供樓，但囝囝係潮童一名，搵得嚟洗得去，食得招積、遊得出色，要供樓即係無名牌無日本無Concert無得食好東西？咁人生仲有咩意義？結果揀樓全程佢都鼓埋泡腮，不斷大呻唔想畀層樓綁死一世。

兄弟比武招金：兩個人一條心就係好伴侶，但兩兄弟得一份首期，就引發一場血戰！慈父母死慳死抵，先捱到一份首期返嚟，結果兩兄弟喺售樓處為邊個買而爭持不下，阿哥話長子優先，細佬就話要大讓細，一言不合，幾乎大打出手，可憐父母既出錢又激心，原本嘅開心事變成家庭裂縫。

反目成仇兩母子：阿仔本來好開心，因為抽到前籌，可以揀到心水兼啱Budget嘅單位，笑到見牙唔見眼，當佢打電話向首期金主媽咪報告，媽咪卻堅持要抽另一個市區盤，否則絕不課金！

你話抽就抽得中？結果又鬧又氹軟硬兼施，媽咪都企硬唔就範，一下子由天堂跌落地獄，堂堂男人喺售樓處喊出嚟呀陰公。

好喇！我認！我講埋晒啲咁嘅負面嘢都係葡萄！我沒有我沒有沒有，從運氣到信心到鑲金老豆全屬某某……

專欄作者簡介：
吳宛盈Carol
做咗10+年電視地產記者，又窮又奄尖喺香港上車無期，幾廿歳學人尋自由玩劈炮，乜都試又睇吓會唔會餓死？

Facebook專頁：
https://www.facebook.com/carolngyy

探索驚奇精彩的 wONdEr 故事，請LIKE 我們的Facebook Page，並設定為「搶先看」： https://www.facebook.com/wondermedia.hk