王菲和張栢芝均是謝霆鋒的舊愛。巧合的是，王菲在上個星期跟愛郎李亞鵬成眷屬，再迎第二春；栢芝又戀上「老外」英語教師，霆鋒人生中的兩個女人不約而同在一個星期內有所依歸，令到人生路途迂迴曲折的謝霆鋒更添幾分戲劇性。
有關王菲和張栢芝這兩人的問題，霆鋒一律拒絕作答，他說：「要check吓人哋係咪有男朋友先，因為咁講嘢會傷害到人哋，單方面講嘢，人哋未必想講，直接講嗰個人唔啱嘅。」

感情事處理失當

年前霆鋒跟王菲拍拖時，閒言閒語委實不少，他承認太多傳言確會增加摩擦，他說：「聽十樣，信一樣已經好大鑊。」霆鋒在情路上兜轉多時，問他認為自己在愛情上是否處理得宜？霆鋒說：「感情係會有多方面嘅問題出現，我先認咗自己都有處理得唔好嘅地方，但我嘅愛情觀係從來冇變過，就係童話式嘅愛情故事。畀我遇到，聽日結婚都肯呀！」
霆鋒聲稱自己算不上小器男友，卻屬於古老石山，他說：「我好保守，女朋友着到好似我個妹咁，會鎖佢門三日啦！唔係要你夏天着樽領，但開衩裙就唔可以開到邊個位，低V就唔可以V到邊個位囉。」
話說回來，問霆鋒將來是否仍敢於與圈中人拍拖？他想也不想便說：「敢！講到尾都只係一個人嚟嘅啫，都係照樣生活，會照樣坐大牌檔、行旺角、打遊戲機，冇好過任何人，亦冇比任何人特別。」
採訪：朱倬誼　攝影：陳慧安
服裝：I.T（牛仔褲為私物）