參加服務獎頒獎禮,遇到議員L,劈頭就問佢有冇十點共識,佢話未有所聞,佢在北京之時,參加政協經濟組座談,所以唔知道甚麼中聯辦與特區政府的十點共識,左丁山笑佢:「你位舊老友占美話有噃?」議員L話:「此乃羅生門,越講越亂,一個話有,一個話冇,你叫我信邊個?」左丁山本來都係懷疑派,但獨家報導此項消息嘅係《文匯報》噃,如果係其他報紙,可以當係小說家之言,但愛國報紙對中台港之政治新聞,家規甚嚴,不得半點糊塗,《文匯報》對呢啲事情,好少講錯嘅啫,唔通偏偏就係錯呢一次?
議員L話:「講呢啲事做乜吖,不如搵埋你一齊刨馬,輕鬆吓好過!」又係噃,議員L有獨門秘方,點都唔肯講畀左丁山聽其中邏輯或推理根據,只係成日話有靈感,「覺得」嗰日旺乜嘢顏色。記得有一次在董事廂房遇到佢,當時人頭湧湧,不便詳細講貼士,議員L只係講一句:「以下幾場睇住紫色綠色嚟買。」咦,連續四場都有紫色綵衣(即騎師件衫嘅顏色)跑入前三名,令左丁山吃了一驚,追住佢問點解知道紫色當旺,議員L一味話靈感忽至,難以解釋。佢既然話到要一齊刨馬,一於應承喇,睇吓可唔可以偷師學睇顏色吖嘛。
講出嚟,啲專業評馬人一定媽媽聲,話有辱專業。左丁山冇呢個意思呀,不可誤會。專業如王登平,方駿暉,吳志林,佢哋嘅貼士經常中到七彩,唔到你唔服,但呢個世界上講親賭博,就一定邪邪哋,不可完全不信,否則如何解釋(好以係二月份)有幾次賽馬,成日跑出十號馬,搞到心水清馬迷追冧巴呢!左丁山鍾意乜都聽,不會完全排斥某一派嘅賽馬「理論」,總之無論白貓黑貓,捉到頭馬嘅貼士就係好貓。