星期日嘅主場以1:2輸畀曼城嘅「曼市打吡」之後，曼聯領隊摩連奴因為不滿曼城喺更衣室慶祝嘅聲浪太嘈，要求客軍降低聲浪同埋音樂聲而引爆雙方職球員嘅大規模衝突，有報道話曼城助教阿迪達喺衝突中畀人用空水樽掟中，搞到眼眉位置受傷流血。據西班牙電台《Cedenaser》報道，掟中阿迪達令佢受傷嘅係曼聯前鋒盧卡古，不過，據悉紅魔方面否認呢位比利時鋒將喺衝突中有掟嘢，但就強調當時喺曼城更衣室有人向摩連奴潑牛奶，而呢一樣曼城方面亦都否認咗嘅。

阿迪達喺星期一朝早揸車返去曼城訓練基地嘅時候，用右手遮住額頭同埋右眼，似乎刻意想遮住傷口唔畀現場傳媒影到。由於「曼市打吡」執法球證奧利華睇唔到衝突發生，球證報告並冇寫到今次衝突落去，所以英格蘭足總已經介入調查，要求兩隊喺當地時間星期三下畫5點之前提交書面報告以作跟進。

--------------------
球迷一定要知！英超一哥曼城，已經登陸​『BFB​』​！登入即送藍月球星： http://bit.ly/2AAiPDS