香港電影評論學會今日公佈「第24屆評論學會大獎」得獎名單，杜汶澤導演嘅《空手道》成為咗8大推薦電影之一，而女主角鄧麗欣(Stephy)仲攞埋最佳女演員，杜汶澤以WhatsApp回應《空手道》雙喜臨門，佢話:「首先恭喜鄧麗欣，佢一直係我心目中嘅影后，o依家唔係，佢真係影后。希望佢可以再下一城，喺不久將來攞埋香港電影金像獎最佳女主角或者其他獎項，作為導演如果套戲係自己仔女，女主角就係自己戰友，因為我覺得佢(Stephy)帶畀我嘅嘢，係多過我帶畀佢嘅，如果冇鄧麗欣我套戲唔好話完成，就算完成到，都係不堪入目，希望佢有一個更加成功將來，更多演出機會發揮得更加好，大家觀眾過往對佢印象，係嚟自對佢一個誤解。希望係新開始，畀觀眾認識到鄧麗欣真正一面。」

講到自己套戲成推薦片，佢就話:「收到消息好興奮，作為一個新導演入選到電影評論學會8大推薦電影，係一個鼓勵，條路好難行，但行第一步有人欣賞係鼓舞，希望自己頂得住撐落去。特別要感謝所有工作人員及投資者，香港電影萬歲！」

Stephy曾經係葉念琛嘅愛將，今日Stephy攞到最佳女演員，葉念琛就回應：「恭喜同好開心啦，唔使慶祝住，佢仲要攞落去，到時再慶祝。」

精選娛聞，喺晒《娛果》
http://fb.com/appledailyent