奕達（2662）呢隻猛料半新股，趁呢期整固之際，買定博佢坐底翻半番。奕達係電子製造服務供應界龍頭之一，客戶包括東芝、華碩及Panasonic等，個個名牌，不能盡錄。集團又係祖國首個採用圓片級晶片封裝技術（WCSP）嘅企業，擁有呢套技術嘅祖國行家，冇乜幾間。呢期日商外判成風，奕達憑住呢套獨門秘技，食住外判風，遲早肥仔水。
Beforethat，奕達啱啱公布06年度中期（12月止），實際純利增長32%，去到1.13億銀，已經出得大場面。估計集團06年純利上到3億銀，PE9.6倍，07年度只係溫和增長20%到3.6億銀，PE8字頭，以12倍做目標，現價（3元）潛在升幅翻半番去到4.5元。再講，奕達本身質地超晒班，PE又吸引，基金見到流口水，一有芬佬埋位，未必係呢區區半番。

上星期五，浩基（628）話搞博彩中介人業務，單日狂升55%，世紀建業（079）仲喺1年超殘位，隨時嚟料。世紀旗下合營，喺上月24日已經同娛樂場訂立書面協議，即時接手承辦博彩中介人業務，新業務好快有貢獻。
又世紀上年11月5供1，結果，大股東連一致行動人士，由原先49%變相增持到53.3%，公眾街貨只係微增1億股咁大把，而世紀現價（0.125元）亦僅較供股0.11元成本價高13%。世紀上番250日線0.15元，潛在升幅20%，都未夠同類瘋狂。
錢雋