連戰到上海訪問之前，賓架陳已自上海回港，問佢去上海有乜貴幹，原來係出席富翁Ｖ之喜事。並非富翁Ｖ包二奶，而是富翁Ｖ位公子迎娶上海美女，富翁Ｖ笑到見牙唔見眼。在上海擺酒，賓架陳專程到上海參加娶新抱宴會。賓架陳話：「富翁Ｖ大仔娶台灣新抱，二仔娶上海新抱，正是海峽兩岸三地一家親，中台統一。連戰兩位公子都去上海，唔知佢哋結婚未呢？如果未，是但一位迎娶北京、上海美人，最好就係高幹千金，以示國民黨共產黨互結秦晉之好。」講就係咁講，政治婚姻未必有幸福，因內裏功利計算太複雜也。

另一位老友財務伍亦去完上海回來，此行係為客戶做顧問，重組部門架構，財務伍話：「做人顧問，唔係乾收銀咁簡單，要替人擋災。架構重組，少不免牽涉到人事變動，一啲瘀血，阻住地球轉，又冇生產力，理宜掃地出門。但係客戶老闆聽我講完，就話我太過書生多議論，唔聽我講，只叫我返公司三日，借我個名一用。三日之後，佢就話遵照香港顧問建議，實施人事變動，將架構合理化。甚麼人事變動呢？就係幾個我認為有能力有幹勁之人，竟然即時被炒，但客戶老闆唔准我出聲，只叫我享受吓上海之生活，可以入佢數！整頓之後，老闆請我去唱Ｋ，貴賓廳內，佢同我講，重組要講吓政治，第一條就係先炒反對派，第二條係炒威脅派，第三先至輪到炒無用之人，佢唔介意畀我顧問費，只要我係好使好用，以後仍然可以做佢顧問！」
你估真係「不為五斗米折腰」乎，財務伍話顧問費用五十斗，點都側側膊，算啦。叫佢解釋詳細啲，財務伍話：「反對派就係在公司內反對我之人，成日阻手阻腳；威脅派就係有能力、可取我而代之嘅人，威脅我嘅地位。呢兩類人係炒魷優先對象，你或者以為荒謬，呢樣叫做realpolitics！」