8號仔前副主席蘇澤光（JackSo）「自願辭職」單嘢已過咗個幾月，蘇生早前已發表三點講話為自己大平反，證明唔係因為「傳聞」所講做唔好份工而俾二少炒，但佢老人家條氣係咪順番晒呢？似乎未必囉！
噚日《南華早報》讀者來函，登咗一則由署名「JackSo,QuarryBay」以《FactsonPCCWresignation》為題，回應南早5月12日一篇《”Personalreasons”forquittingtobedisclosed》嘅報道。
查實前一篇報道只係話交易所有個新規定，話上市公司董事局成員如果以私人理由辭職，需要解釋係咩私人理由，執筆嘅記者用咗JackSo向電盈董事局請辭做例子，話佢冇解釋請辭理由。

令佢老人家傷心

咁讀者蘇生就話，由於執筆嘅記者只相信「消息」而唔求證，又唔check清楚之前嘅報道（蘇生連報道日期同記者名都寫出嚟）就亂寫，令佢老人家傷心，所以特別再提：「事實」係響佢領導之下，電盈舊年嘅生意表現好過05年，而8號仔嘅董事局亦為佢發表咗鳴謝聲明。
其實，JackSo月初發表三點「自願聲明」後，經已攞番個尾彩，更精采嘅係，次日見報，二少份《信報》出咗蘇生嘅獨家專訪，真情剖白佢同二少舊年賣盤單嘢後點樣意見分歧。據聞訪問一早做落，但夾正4號先出街，大家都遮住嘴笑，原來蘇生都好識運用傳媒嚟剃人眼眉！
呢pair「電盈雙澤」加埋都成百歲，家陣一個賠足錢一個收足銀，和氣收場咪算囉，山水真係會相逢㗎！
[email protected]