由上年開始，中央多番出招打壓樓價，但始終成效欠奉，內地樓價依然居高不下。前晚國務院再提出8條措施壓樓市，其中有3招被市場視為狠招，將會直接衝擊樓市：第一招是將購買第二套住房的首期付款比例，進一步提高至60%；第二招與去年香港推出的招數相似，規定個人購買住房不足5年轉手者，統一按銷售收入全額徵稅；第三招是要求地方政府，設定新建房價控制目標。
新招一出，昨日中港兩地的內房股都無可避免地下跌，不過，大市氣氛其實並未太受影響，應屬震央的A股，更是低開高收，繼續反彈，亦帶動港股一度重上24000關，不過，港股上升動力始終欠奉，A股一收市就企唔穩，接連兩日都見有投資者逢反彈套利的動作。
當然，要對市場先生公平一點，昨日下午標準普爾下調日本長期主權評級，雖然投資者自歐債危機後對此等消息已漸感麻木，但或多或少影響投資者的取態，尤其農曆新年將到，都想留多個錢開心過年。以近日的表現來看，只可以話港股絕對唔算好，但又差唔晒，好淡雙方不停角力，方向尚未明確。
策略上，之前筆者提及會待期指出現陽燭，便買入認購期權博反彈，前日已按計劃買入，不過如果問我有無信心，其實都只係一半半，大家一定奇怪士佳既然並非信心十足，為何仍然去博？老實講，讀者應知道士佳比較少用期權，如果真係信心滿滿，我已經選擇期貨了，以期權去博，最多在期指跌穿23653時止蝕，勝在輸晒有限。