鄭欣宜日前喺許冠傑演唱會擔任嘉賓,聯同許懷欣、許懷谷獻唱《父母恩》,欣宜事後指都唔敢翻看屏幕上,播出佢同媽咪肥姐沈殿霞合照,免得喊出嚟影響表現,仲有半個月左右,就到母親節,每當呢啲日子都會令欣宜更加思念媽咪。
今晚欣宜參與金鐘一個以「頌親恩」為主題嘅慈善晚宴,欣宜獻唱三首歌,當中佢特別唱咗首《無人完美》,佢話:「呢個歌名嘅意思係媽咪教我嘅,我減肥時面對好大壓力,不過媽咪教我,呢個世界係無人完美,有時唔完美先係完美,其實當時好多負面新聞抨擊我,媽咪教我冇可能人人都會鍾意自己,做好自己先最重要。」
見欣宜染咗一頭啡金色髮色,原來佢係為咗同張智霖及周秀娜合作電影而染嘅,戲中佢要飾演MK妹,佢話:「我都唔係好慣呢個髮色,又好羨慕周秀娜同張智霖可以出埠取景,我就只係喺旺角一個天堂度拍。」
不過為求令自己更加有MK味道,近日佢不停聽MK-Pop,問佢鍾意聽天堂鳥定FAITH?佢就指鍾意FAITH多啲。
嚟緊仲會接拍一套要打嘅電影,已經開始習武,佢話:「暫時未出現手瘀腳痛,亦做到一字馬動作,大字馬就要再練習下。」