52歲台灣導演鈕承澤，因涉嫌性侵女工作人員，連日來當地大批傳媒都喺佢屋企樓下守候。噚日佢剃頭現身大安分局應訊（相關新聞︰ https://bit.ly/2L0sV4h），噚晚返屋企後，直至今晚佢再次現身。

據台灣《蘋果日報》報道，周一（10日）將會面對台北地檢署審理嘅鈕承澤，今晚突然喺屋企跑出嚟，當時佢一身運動裝並戴住口罩，一路跑去國父紀念館方向，令現場傳媒一時措手不及，跟住佢一齊跑。雖然佢戴住口罩，但佢有向在場嘅傳媒講︰「我要去跑步。」之後佢跑入去國父紀念館內，前後約跑咗17分鐘，大約1公里左右，睇嚟有啲疲態嘅佢隨即返屋企。

而今日下午台灣《蘋果》喺鈕承澤屋企樓下守候，見到鈕承澤弟弟落樓去超級市場，並同一名女友人邊行邊商討事情，記者問佢係咪嚟陪哥哥？佢點一點頭。問到鈕承澤目前嘅狀況如何？鈕承澤弟弟話：「你們這幾天都看到了啊！」問到鈕媽媽有冇嚟探過鈕承澤？鈕承澤弟弟兩手一攤，指向傳媒無奈話：「怎麼來？」

鈕承澤爆出性侵事件後，噚日現身時剃咗頭髮，外界嘅焦點都放喺佢為乜剃頭，問番鈕承澤弟弟，係咪佢自己剃？鈕承澤弟弟兩手一揮，唔想回答，隨後同女友人上樓，大約5分鐘後，一名律師到場快步上樓。

精選娛聞，喺晒《娛果》
http://fb.com/appledailyent