近日特首嘅新年賀辭，希望大家能夠有羊嘅特質，暗指港人要服從，要有羊群心理跟大隊。現年三十四歲嘅伍家謙就反其道而行，拒絕做跟大隊嘅羊，皆因他初入行便遇着名師伍晃榮指導，從而成就出彩的人生。

去年無綫新聞及資訊部風起雲湧，當足十一年「體育新聞王子」嘅伍家謙選擇離巢，當時佢否認怕秋後算賬，只係希望作更多嘗試：「我唔甘心永遠留喺同一個位置，人生要精采就出外闖，我好記得恩師伍晃榮同我講過『做嘢永遠要諗吓點樣比大隊行前少少，非必要都唔好跟隨大隊』，我覺得有時比人行前少少，或者可以睇得更多。」

所謂同姓三分親，伍家謙秉承恩師伍晃榮輕鬆風趣嘅報道手法，諗起同呢位前輩共事嘅點滴，佢百般滋味在心頭：「伍晃榮做嘢好認真，要求非常嚴格，初初入行嗰陣成日俾佢話唔識包裝新聞，嗰時我都真係有啲，試過寫一份講稿俾佢彈足三次番轉頭，最激氣係佢每次都唔會講原因，試過有次捱咗一晚通宵交稿，佢都話我做唔到佢要求，話我原來仲唔明白佢想要乜。」

由當年體育組新秀，到今天被封為「體育新聞王子」，伍家謙現在自然明白恩師當年嘅一片苦心，佢笑住話：「嗰陣剩係掛住寫稿，冇留意到講稿同畫面配合得唔好，只係識得嬲，梗係抵鬧啦！不過伍生係有讚有彈嘅人，有次做完直播接到佢電話，以為佢又想鬧我，點知佢笑住同我講『你依家可以話畀人知，你識我喇！』」

2008年4月17日，伍家謙永遠唔會忘記呢個沉重嘅日子，嗰一日，佢痛失咗一位同佢朝夕共對嘅良師益友，佢話：「4月17日本來我放假，因為公司知道我同伍生最熟，又知道佢喺彌留狀態，所以叫我返去幫手整理生平，同業都明白，我哋經常都要準備呢啲資料，但估唔到我要整理嘅生平，係一個我咁熟悉嘅人，最後喺我整理資料期間，已經聽到台前做直播嘅同事宣佈佢死訊。」

當體育新聞主持多年，觀眾對伍家謙嘅印象僅限於「上半身」，不過，去年底已回復自由身嘅佢，極速殺入男模界分一杯羮，不少粉絲驚覺家謙哥哥原來昂藏六呎二，可惜王子名草有主，前年已成人夫。