【新增內容】

「第41屆山路文子電影獎」昨日舉行頒獎禮，由濱口龍介執導、東出昌大夥拍唐田英里佳合作電影《睡著吻別 醒來擁抱》獲得最佳電影，唐田英里佳就獲得最佳女新人，佢獲獎時激動到眼濕濕，話能夠站在台上領獎簡直係奇跡。

安藤櫻憑《小偷家族》獲最佳女主角，但佢因身在大阪趕劇缺席，安藤櫻透過事務所發表得獎感言，話生B後接下《小偷家族》呢部作品，無論係當女優定媽媽，都係一個好好經驗。導演大林宣彥就現身頒電影功勞獎畀任監製嘅太太大林恭子。

另外，「第40屆橫濱電影節」今日在官方網站公佈得獎名單，《睡著吻別 醒來擁抱》再成大贏家，連掃最佳電影、最佳導演、東出昌大憑呢套作品與《孤狼的血》嘅役所廣司瓜分影帝，唐田英里佳則奪最佳新人等，而上位男星吉澤亮同獲頒最佳新人。影后方面，安藤櫻靠《小偷家族》再下一城，最佳男配角係松坂桃李，而松岡茉優、伊藤沙莉齊齊奪得最佳女配角，而《屍殺片場》就贏得評審特別獎。

至於頒獎禮亦公佈2018年十大電影，《睡著吻別 醒來擁抱》排名冠軍，《孤狼的血》、《小偷家族》、《花筐》、《屍殺片場》亦順序打入前五名。

精選娛聞，喺晒《娛果》
http://fb.com/appledailyent