一連五日嘅英國大型音樂節Glastonbury Festival正於當地舉行，今年又獲各地音樂人鼎力助陣。曾勇奪格林美嘅新西蘭創作女歌手Lorde於台上大展歌喉，英國殿堂級搖滾樂隊Radiohead重臨舊地獻技兩小時，贏得歌迷熱烈掌聲及吶喊支持。

今年榮升人父嘅荷李活男星畢列谷巴（Bradley Cooper）竟有驚喜現身，更拿起結他大展身手，原來佢係為自導自演嘅電影《A Star Is Born》進行拍攝，搵現場觀眾做老臨配合片中情節，畢利呢次飾演樂壇初哥，更夥拍樂壇天后Lady GaGa，早前二人就曾喺Coachella音樂節取景。

另一方面，美國影星尊尼狄普（Johnny Depp）前日亦有出席Glastonbury Festival，佢於活動上笑問觀眾：「對上一次演員暗殺總統是何時？」以演員布思（John Wilkes Booth）於1865年刺殺總統林肯來開玩笑，此言論引起特朗普一班支持者猛烈批評，翌日尊尼即認錯，解釋自己並無惡意，更自認其玩笑係「低級趣味」。