公用股中電（002）先宣佈加價，再趁機高位抽水，芬佬話九成係見頂，魏力都幾同意，因防守股係大市唔明朗先炒，目前市況好轉、基金追貨，換入周期股係合理決定。
有乜國策支持、而股價仲係好落後嘅板塊呢？魏力諗來諗去，都係風電股最值博。按走勢揀股，首選係龍源電力（916）。先睇市值，龍源高逾150億銀，遠高於中傳動（658）的38億及金風科技（2208）的15億，行業龍頭毋庸置疑。炒復蘇必然龍頭先行，近日走勢良好，可優先關注。
龍源為全球第二大風電營運商，向各地方電網賣電，直接受惠中國用電量上升，11月發電量按年增長7.9%，傳統電力股炒起，龍源具追落後概念。中傳動及金風則為風電設備製造商，目前風電業問題係設備太多，根本唔需要再增添設備，故走勢低迷不無道理。