跟詹Sir學驗樓驗到去劏房，今次《蘋果驗樓》去到麗新（488）旺角逸新一個實用182方呎單位。以為單位細瑕疵少，睇漏機會微，結果都睇漏牆身空鼓、廁所瓷磚窿。雖然窗戶玻璃確實沒有崩花，但是詹Sir話，驗窗有「五大訴求，缺一不可」，純粹睇崩花只是美觀性，還有結構、安全、規格及耐用，「（無論你）幾有誠意、考幾多個第一……驗樓真係唔可以瞎子摸象式去睇。」他暗寸特首林鄭月娥以偏概全。至於驗樓單位評分88分，算不錯，除了瓷磚窿罅，廚櫃門不持平亦扣去部份分數。

業主2017年斥資約320萬元買入旺角逸新低層戶，實用182方呎，記者率先驗一轉，詹Sir抵埗後逐一匯報。趁日光日白先睇窗，表面痕迹一捽就甩，理應不是花痕，只是污迹。問詹Sir是否如此，他回應：「睇窗除咗睇玻璃，仲有好多嘢要睇，就係五大訴求，缺一不可，包括結構性、安全性、規格性、耐性性、美觀性。玻璃花唔花就係美觀性嘅嘢，仲有好多嘢㗎喎！結構性出現問題，隻窗會跌落街。安全問題，有啲配件唔穩陣，跌落街會掟死人。規格性，啱唔啱規格呀，有時玻璃有一點，可能刮花少少，啱規格喎，但發展商唔同你整。耐用性，而家唔漏水啫，5年後漏唔漏水呢？」

他指出，玻璃幕牆每平方米可接受8條不多於100毫米花痕，而現場玻璃略為超出1平方米，可接受10條不多於100毫米花痕，「有時搵到啲丁咁多刮花，發展商係唔會搵人來整，因為及格呀嘛。（詹Sir覆檢吓，我一條花痕都無搵到。）等我睇過，拎個背囊嚟，哎！囊來了。」他取出黃色紙仔後續說：「呢個囊來了唔緊要，驗樓有時都怕咗啲狼來了，係又話錯，唔係又話錯，啱又話錯，錯又話啱，狼來了式處事手法。記住呢啲招紙，簡稱記招，唔可以有狼來了出現。話時話坊間有啲人又唔讀書又唔做嘢，佢哋知唔知狼來了嘅故事。」

他再教路：「耐用性最難驗，係窗扇與窗框之間有條膠條，硬化後容易造成漏水。所以要摸吓啲膠夠唔夠軟熟，幾有誠意，考幾多次第一，用瞎子摸象方式去摸都可能睇漏，驗樓真係唔可以瞎子摸象式去睇。有無人唔識瞎子摸象的寓意？」詹Sir意指，驗樓驗窗不能以偏概全，需要按足程序及步驟。結果單位玻璃窗只是有污糟，無刮花，符合五大要求。不過設計上「玩死人」，詹Sir半個身伸出窗，兼要徒弟康仔從旁邊露台將窗頂多一下才能把窗開到安全鎖位置令窗戶頂實。

客廳大窗下收水裂紋，容易有熱脹冷縮。詹Sir話：「啱一半唔啱一半。呢啲撕裂有自然因素。你睇唔睇裂紋由雲石邊起開始裂起，我可以肯定，貼雲石用嘅英泥沙同下底石屎係兩種物料，溫差出現後，駁口位就出現裂紋，基本上無得救，除非用駁口帶遮住裂紋，其實唔係無條裂紋，只係隱藏喺油漆背後，不過就好睇啲。」旁邊最大幅牆身似乎沒有空鼓，但詹Sir就叫敲吓近地腳線一處批盪，一敲原來是空鼓，但面積小於一平方呎，一般發展商不會處理。

廚廁來去水沒有問題，廁所洗手盆邊有窿罅，廚櫃門刮花。不過詹Sir覆檢後指出，企缸瓷磚掃口位睇漏窿仔，由於處於中低位，淋浴時有機會入水，必須修補。而廚櫃門不單止刮花，還不夠持平，有一道門更是彎曲，總結單位驗樓得分88分。

記者：陳家雄、張嘉鎣

影片：
採訪：陳家雄、張嘉鎣
編撰、旁白：張嘉鎣
攝影：細釗
剪接、後期：細朗
編審：楊智佳