本來大家已經唔記得可嵐係邊個,但依家因為佢同老公尤子威變成咗港版黃奕X黃毅清事件咁,仲開埋記招兼日日有料爆,,反而令人忽略咗佢最近參加咗《中國好聲音》第三季香港區招募。
有關可嵐嘅爆料,真係多不勝數,由家暴到被迫墮胎,老公北上深圳搵二奶都悉數盡現讀者面前,前日更有報道話尤子威對囝囝講話唔想要佢,傷盡小朋友心靈。至於點解明明夫妻關係已經瀕臨破裂,但仍「意外懷孕」,可嵐就解釋謂係因為男方話想生。不過噚日另有周刊報道,指尤子威主動聯絡傳媒澄清,指摘可嵐設局:「個胎喺佢個肚度。其實搞咁多事出嚟咪又係為錢,我梗係畀人屈啦,佢一路都話有避孕,如果冇咪出句聲,我用安全套囉,佢錄我音一定係早有部署,係陰濕。」
尤子威發完功,今日凌晨時份輪到尤子威個疑似深圳二奶小玲發功。佢喺微博隔空呼應尤子威,夾擊可嵐,佢話:「這個世界有時就是這麼醜陋,有些人總能一次又一次,自編自演宮心計現代版。現在無助的啞忍只是不想給人利用永無休止的炒作出位。不值得……」
到今日中午近二時左右,小玲再次更新微博,斬釘截鐵否認同尤子威仍有來往,更表明同對方已成過去式,並再次明寸放料嘅可嵐:「可能我真是太以為清者能自清了,沒及時關掉微博,讓那有預謀的人又有機會偷我的相做文章,還說到我人生好像只有一位過去式,真是當後來的現任是死的嗎?好吧,雖然知道真相的人始終有限,但就算沉默啞忍別人暫時的誤會,我也不想助長這些惡行。其實到最後想從中獲得些什麼?或者,又是一個錢字。」