【英超】紅軍兩連和係輪換出事? 高路普:唔關事!
英超西布朗利物浦愛華頓輪換高路普
利物浦近兩場英超主場全部和晒,而且火力減弱只係夾埋入咗一球,有人就將問題歸咎佢哋輪換出事。領隊高路普周五出席賽前記者會時,就表明球隊表現甩轆與輪換無關,打吡戰和波只係唔好彩,而周三賽和西布朗就係因為球隊表現差。
喺打吡戰嗰時,紅軍意外派出蘇蘭基、阿歷士張伯倫、安德魯羅拔臣出任出選,對西布朗嗰時又出返羅拔圖法明奴、沙迪奧文尼呢啲常規正選。外界批評高路普輪換過多導致球隊失分,但佢本人就否認:「我哋主場和咗兩場,有批評係正常嘅,但我諗呢兩場係完全唔同嘅比賽。」
高路普又話:「對愛華頓嗰場我哋打得好好,係我嚟到之後其中一場打得最好嘅打吡,但最尾結果出錯,我哋只係唔好彩。坦白講,對西布朗嗰場我哋唔配有運,我哋打得唔好,發揮唔到真正實力。我哋踢得唔夠流暢,傳送亦唔夠出色。呢兩場打得唔好,但近幾個禮拜都唔係場場打得差,所以我唔覺得關輪換事。」
另外高路普亦都話,養傷多時嘅中場拉爾拉拿經已復出,可望喺周日作客般尼茅夫嘅賽事上陣,而祖爾麥迪比、艾拔圖摩蘭奴同埋尼達利基尼就唔出得。
--------------------
球迷一定要知!英超一哥曼城,已經登陸『BFB』!登入即送藍月球星: http://bit.ly/2AAiPDS