【經典遊戲機】懷舊有市！ PS出迷你初代機玩廿隻經典Game
蘋果日報 2018/09/19 16:08
PlayStation復古FINAL FANTASY經典遊戲機PlayStation Classic
PlayStation將於今年12月3日在香港推出迷你遊戲主機「PlayStation Classic」，售價$798。
懷舊永遠有市場！近期多款8、90年代的經典遊戲機都推出復刻迷你版，令一眾老機迷雀躍非常！而作為當今遊戲界龍頭大佬的PlayStation又點會執輸，啱啱佢哋就正式宣佈，將於今年12月3日在香港推出迷你遊戲主機「PlayStation Classic」，日子正好係於1994年12月3日推出的初代PlayStation的24周年。PlayStation Classic外形設計基本上完全複製自初代PlayStation，機上按鈕、控制器、甚至包裝都跟足當年，只係機身縮細咗45%，重量就輕咗80%，變得相當可愛易收藏。
單是外形相信已經夠fans們high爆，遊戲亦相當吸引，資料話遊戲機會內置20款經典作，包括《Final Fantasy VII》、《Jumping Flash!》、《Tekken 3》、《Wild Arms》，連記者初中時狂煲過的賽車game《R4 RIDGE RACER TYPE 4》都有！至於其餘的遊戲會係乜？就要再等消息，唔同地方版本，亦可能有不同預載遊戲，有進一步消息Gadget Guy會即時跟進。比較可惜嘅係，新機將會跟之前幾款復刻迷你版主機一樣，只會有預載遊戲，而唔可以另加或download其他遊戲，不過以$798價錢嚟講，當買個回憶都抵嘅。
硬件方面，雖然新機以HDMI輸出，但遊戲只會以720p或480p顯示，不過唔緊要，起起地格先有十足舊feel嘛。另外根據官方圖片，手掣好似唔會按比例縮小，而係用番跟原版相近的大小，更會一機跟兩掣，操控更有手感，亦方便對打，玩《Tekken 3》啱晒！最後，據知呢部PlayStation Classic將會係「限量」發售，但有幾限量呢，就未有正式公佈，Gadget Guy會同各位一齊密切留意消息！
記者：韓繼聰
PlayStation Classic外形設計基本上完全複製自初代PlayStation，甚至包裝都跟足當年。
新機以HDMI輸出，但遊戲只會以720p或480p顯示，最正係一機跟兩手掣，可以雙打！
資料話遊戲機會內置20款經典作，《Final Fantasy VII》呢隻經典中的經典唔少得。
記者初中時狂煲過的賽車game《R4 RIDGE RACER TYPE 4》都有！
根據官方圖片，手掣好似唔會按比例縮小，而係用番跟原版相近的大小，操控更有手感。
PlayStation Classic外形設計基本上完全複製自初代PlayStation，只係機身縮細咗45%，重量就輕咗80%，變得相當可愛易收藏。
《Tekken 3》亦是確定內置遊戲之一，比較可惜嘅係，新機將只會有預載遊戲，而唔可以另加或download其他遊戲。