王維基嘅HKTV開台，對TVB有冇衝擊?今個星期嘅收視表就出爐，雖然800個機頂盒去統計收視呢個方法已經好落伍，不過o依家得呢個方法睇收視，唯有將TVB今個星期同上個星期嘅收視對比下。

HKTV係19號開台，即係星期三，我哋睇返上星期四同五TVB嘅收視同今個星期四同五嘅收視，13號(四)8點半時段《老表你好hea》收視為25到27點，14號(五)就係23到27點，而去到20號(四)就係24至28點，21號(五)就曾一度跌到得21點，最後一節先升返去26點。

到9點半時段嘅《名門暗戰》，13號(四)就係徘徊23到24點，14號(五)就一直係24點，去到20號(四)同樣都係23至24點，21號(五)最高曾微升至26點。

其實TVB嘅慣性收視一直以來都慢慢咁流失緊，以前一套普通劇動輒都有30點以上平均收視，到o依家有30點直頭要開慶功宴，面對HKTV製作新穎題材嘅劇集，TVB繼續拍膠劇嘅話，年青一輩只會愈來愈離棄大台。