甄穎珊重遇光岡　舊情復熾

蘋果日報 2008/01/31 00:00

呢個係一個舊情復熾嘅愛情故事，話說甄穎珊曾經同光岡有一段情，佢同佢前男友曾經齊齊擁有一架十幾年嘅光岡舊車。都係我衰，我挑起咗Carisa對舊愛思念之情，佢含笑回味話自己最愛懷舊，最冧古董車，以前男友架綿羊仔，都係十幾廿年嘅Lambertta古董羊……今日，Carisa見番舊愛，即刻跑過去、撲埋去、擒上去，將身體壓喺佢身上瘋狂咁……擺Pose。
難怪，Galue擁有光岡車系優良血統，手做車身，加上圓燈電鍍鬼面罩古典味濃，裏頭仲有電動皮座豪華格局，好容易就令Carisa重拾舊歡。
呢張佢同光岡Galue嘅纏綿照，自動波的，絕對冇移花接木。

文：嘴嚼爺
攝：譚盈傑
太長……唔掂
記者早前同Freeze另一成員甄穎珊（Carisa）做訪問，得知佢半年前買咗架Mitsuoka「光岡汽車」Viewt復古車，所以今次順理成章，專程搵佢揸埋架車出嚟做訪問。先講少少關於光岡汽車嘅歷史：光岡係日本10大車廠之一，最耍家係製造50年代美國風味嘅懷舊車。由於車身設計以JaguarMK-11為藍本，外形似足Jaguar懷舊車，所以勁吸引車迷。
而Carisa曾經同前男友以7萬車價買入一架94年光岡Viewt，佢話：「最鍾意呢架車係4門但車身又唔係太長，我學車揸自動波萬事得121，我揸車唔叻㗎，太長嘅車我揸唔掂。」對Viewt念念不忘，以為佢分手後蝕賣係為咗撇脫忘情，Carisa即數臭舊愛：「始終十幾年車，壞完車門又壞Handbrake，又難搵零件。試過乘客位度門整極都整唔好，上車落車都要擒過去司機位嗰邊，有次喺旺角落車先發覺又開唔到門，幾樣衰！」
一副送舊迎新格局，不過今次新車係光岡新代理頭炮，有完善保養服務唔怕無零件，Carisa一見到即讚：「嘩，成架勞斯萊斯咁呀！好懷舊好古典好靚！我最鍾意佢個車尾，嗰啲尾燈好有氣派，而且頭先坐咗一轉，個後座好闊好舒服，真係好似大小姐咁。不過呢啲車都係請個司機揸襯啲……」
人要進步，你都越大越靚啦，如果要重拾光岡舊歡，梗係揀個請得起司機㗎啦，呵？
empty
■甄穎珊話未揸慣Galue，有啲驚，但長車頭好有安全感。
empty
■中控台有一萬個掣，LCD仲睇到左鏡及車尾鏡頭影像。
empty
■中控台下設行針時鐘，音響亦被木紋裝飾包圍。
empty
■4圓錶板不失典雅風格，更展現了現代氣派。
empty
■車內都好有古典Feel，最格格不入係黑皮軚環，襯番桃木軚相信會更好。
empty
■Keyless按掣撻車系統，配上大量木紋裝飾，令Galue更有豪華貴車格局，始終車價接近80萬，唔交足貨點得？
empty
■廠徽設計古典獨特，予人一種經典完美感覺。
empty
■窗邊都包上電鍍位，令整體格調更合襯。
愛軟……唔愛硬
呢架全新第三代Galue，同佢嘅同門師兄弟一樣，都係用日產車系底盤再加上人手打造嘅頭尾車身加古典線條精工造成。今次用上日產Fuga嘅大車底盤，車長達5米，前後軸距2.9米，對考咗4次牌先成功嘅甄穎珊嚟講都幾大考驗。
唔敢揸唔敢揸，問完車價70幾萬，甄穎珊更加唔敢揸，不過經筆者介紹過，車內中控台LCD接駁咗側鏡嘅鏡頭，將轉彎盲點減到最少，而且泊車亦有車尾鏡頭輔助，佢先敢坐上司機位慢行咗一段。「揸落無想像中咁難，坐喺司機位就會感受到車頭好長，好有安全感。我唔敢揸得快，不過頭先坐你車就覺得架車好穩定好順暢，而且避震應該調校得比較軟，好舒服。我最唔鍾意坐跑車，即係GT-R嗰啲，一兩轉就冇所謂，但成日坐好唔舒服，啲人揸得呢啲車都Set到好低好『Dun』，遇到凹凸不平嘅路『Dun』到死。」
Carisa鍾意坐唔鍾意揸，筆者惟有補兩句性能描述：雖然頭長尾長，但車重1,690kg比想像中輕量，以3,500c.c.V6偈推，試車當日上加多利山，唔算好好力，但加速都好暢順，後輪驅動，車軸夠長，以略快車速入彎都好穩紮。始終呢架Galue都係以古典美同豪華氣派掛帥，斷估你唔會買嚟片車玩甩尾啩？
empty
■後座極為寬敞，中間位置亦可拉低變手枕，甄穎珊話坐喺後座好似千金小姐一樣。
empty
■長長直直一條尾燈，又係古典豪轎格局。光岡車系手工精緻典雅，喺路上收視率都一直高企。
empty
■CVT波箱，暢順感已令人滿足。
empty
■車身又大又長，配番18吋軨才不突兀。
後記：男仔有車牌Man啲
靚女多人追，要突圍就要投其所好。Carisa說最愛古董車，但未必揸得掂，如果自己買車就會揀番Echo等實用易揸車仔。咁如果裙下之臣揸架啱心水嘅車會唔會加分？「梗係會！我最鍾意Cutie車仔，即係好似《瘦身男女》劉德華揸嗰架朋友號咁，如果有男仔揸嚟接我，嘩，我真係……好難抗拒唔上車。」不過Carisa話，揀男友未必要有車，但最緊要有車牌喎：「我以前男友除咗拖頭牌之外，巴士的士電單車所有牌都有齊，我覺得男仔最好有車牌，感覺上Man啲㗎。」
empty
供款幫你計：
首期：$79,800
利率：5%
月供：約$17,955（48期）
＊註：以上數據僅供參考
光岡Galue350LX規格
引擎：3,500c.c.V6
馬力：223ps/6,800rpm
扭力：26.8kgm/4,800rpm
傳動：CVT無段變速，後驅
體積：5,000×1,805×1,510mm
售價：$798,000
查詢：金濤汽車專業（27115163）
empty
翻舊賬
甄穎珊唔使10萬購入咗呢架光岡Viewt款車系，屬94年出廠，其賣點係外形似足復古車，而性能絕對係現代化。「自己本身好鍾意好懷舊嘅車款，最初有考慮買舊款MiniCooper或餓𡃁之Van，但自從喺網上見到呢架光岡Viewt之後，就被佢復古嘅外形吸引住。」全車復古外形、懷舊鋼線胎軨、杏色皮座椅，Match得好似60年代復古車。車身細細，有1,300c.c.容量，甄穎珊話操控非常容易，最近重經常帶埋Freeze兩位Partner四圍去玩去食㖭！
empty
■年前甄穎珊和前男友擁有嘅Viewt，94年出廠年紀大機器易壞，而且當時搵零件好難，所以分手後就賣咗喇。