出名貴嘅翠華茶餐廳（1314）早幾年吼住內地自由行多，一路擴充，家陣遇到市況逆轉就出事嘞。公司前晚發盈警，預告舊年盈利要跌一半，公司股價噚日即刻碌落山腰，受影響嘅，除咗係一班小股東，當然仲有大股東兼主席李遠康嗰份身家啦。
翠華五位主要股東係綑綁式持股，佢哋喺2012年底上市前簽咗契據，同意共同控制各人持有嘅股權，佢哋一齊持有翠華64%股權，拆番開去計，主席李遠康應該持有26%左右。

純利跌8,000萬

翠華上市後，股價持續造好，呢五位大股東手持股份嘅市值，喺2013年一度升到去50億元，可惜之後就無以為繼，兼且一路向下調整，發盈警後，噚日再急挫8.5%，收市報1.3元，五位大股東持有嘅股份，市值得番12億元，較高𥧌期唔見近八成，單計李遠康手上嘅股份，市值唔夠5億元。
老實講，翠華話純利跌一半，認真唔出奇，有時幫襯個別喺旅遊旺區嘅大舖，都見到吉位。喺香港地開餐廳，租金、人工、水電煤係固定開支，收入一下跌，好容易即刻計唔掂數。翠華前年賺1.6億元，跌一半即係8,000萬元左右。李老闆為咗保住自己副身家，應該都要好好諗計，力挽狂瀾嘞。

李華華
mailto:[email protected]