在香港為人父母，擔子一點也不輕，不單止要供書教學，還要想盡辦法為他們未雨綢繆，希望他們長大後可以安居樂業，諗起都覺得不輕鬆。

踏足演藝界已近三十年的金牌司儀鄧梓峰，身為四個子女的阿爸，同樣感同身受，他説香港樓價高得不合理，就算有錢，也不會幫他們在香港買樓，但就從小替他們買醫療保險和教育基金，認為這才是對子女最好的投資。如今四個仔女都在美國波士頓讀大學，昔日搏命賺錢所供的基金實在幫輕不少。

很多人都想子女學成後立即回港，但鄧梓峰反而鼓勵他們畢業後在外邊闖蕩見識。原來，鄧梓峰的管教態度深受做航運的爸爸鄧廷琮所影響，對新事物新知識都充滿好奇心，鄧父1949年由大陸走難來到香港，打仗時在國內時看到一架架轟炸機在天空飛過，讚嘆美國科技之先進，後來更隻身往美國讀書工作，白手興家，成就了自己的航運事業，更成立教育基金資助貴州家鄉的窮困兒童出國留學，也希望兒孫傳承爺爺這種闖蕩的精神，放眼世界，不單止可以輕輕鬆鬆，還要過一個多姿多彩的人生。

持家之道：未兩綢繆儲彈藥

訪問在清水灣鄉村俱樂部進行，當日鄧梓峰要參加一項為癌症病人籌款的慈善高球賽，很早已到場熱身準備，他是一個很有計劃和不容易慌亂的人，說就算不幸得了癌症，也一樣可以有計劃地面對，「我有朋友崇尚天然療法，知道有癌症後覺得一日未做電療化療，身體狀況是最好，抵抗力最強，所以嘗試在飲食生活習慣上改變，慢慢真的可以恢復過來，癌症病人都有選擇，不一定要第一時間電療，最緊要用舒服有信心的方法去醫治。」

未雨綢繆、居安思危是鄧梓峰的信念，也是持家之道，「我的持家之道，最緊要自己有能力的時候，要盡量儲彈藥，預防自己無能力賺錢時積穀防饑。」

他有四名子女，其中一對是孖仔，為了他們的成長及教育需要，鄧梓峰早在他們出世時已買定醫療保險及教育基金，「我在佢地未出世前，已經做好計劃，當他們一出世，便幫他們買保險及儲讀書基金，這是最化算的，因為BB仔一出世由零開始儲，供款好平，同時在他們成長過程，的而且確賠過保險，細路仔梗有些意外，大感冒需要入院，亦都賠到。」

教育基金供18年一樣值得

四個仔女都在美國讀大學，學費生活費每人每年近七萬美金，鄧梓峰説全靠當初儲的教育基金減輕負擔，「每個細路都有買讀書基金，供的時候你覺得好似好長遠，嘩，一供18年，唔知18年後會點，但係有需要。18年後，醫藥費、學費必定貴過現在，所以早啲供，到你將來讀書需要用時便可以幫輕啲。」

「醫療保險每人一年三千多元，教育基金我訂一個目標額，基金公司就根據呢個target定出每年供款，例如我定18歲要有15萬美金，根據個計劃就計到每年供款，到期就拎出來交學費。」

子女都在他母校波士頓大學讀書（鄧梓峰讀會計），他説這校有一個很著名的學生就職計劃，他的仔女也有參與，覺得好玩之餘，也可以幫輕學費，「計劃半年至一年，叫做co-op，學生要出去做嘢，同實習不同，你來實習只有車馬費，但他們做co-op會出正式人工，他們做半年嘢，可以得到實際的工作經驗，再返去讀課程，同時又賺到錢，他們都好享受。兩個孖仔上學期已經做完，去美國一間好大的網上傢俬店，一個做planning，一個幫手design，他們仲有個選擇可以做多半年，人地美國大學四年畢業，他們可以讀五年。」

很多父母都擔心將來子女外國畢業後回港的發展，甚至為他們買定層樓做好準備，但鄧梓峰説即使有錢也不會這樣做，「自己財富當然希望留俾佢地，但係買樓就未諗過，因為而家樓價實在好唔合理，嘩，攞同一筆錢係香港買一間屋，可以在其他地方買到更大既空間和標準。」

畢業唔好立即返來見爸媽

「因為今時今日你好難話有個好周詳的計劃，一個畢業的學生，出來工作好難計算十年後可以買間屋，十年後你儲的錢未必可以比你買到間屋，上上落落的樓市，唔係咁啱你遇到的機遇。」

他反而鼓勵子女畢業後不用急於回港，要多在外面世界見識闖蕩，「我成日都鼓勵仔女唔好大學一畢業就返來香港見爸爸媽媽，鼓勵他們周圍走，你去邊都好，都無所謂，因為有咗互聯網之後個世界係平嘅。而家好流行去外地做半年，我認識有些年輕的朋友，儲少少錢又可以享受幾個月，去完台灣工作，下一次去澳洲工作，或者去紐西蘭做嘢，他們是咁樣的生活態度，我都贊成，因為世界咁大，你應該要周圍走。」

收藏舊物穿上身有感覺

這種對世界的好奇和探索，也反映在他的嗜好和收藏上，鄧梓峰愛收藏舊皮褸和低音結他，覺得有一種穿越時光的感覺，「舊物件有歷史價值，例如我買一件40年代的皮褸，人手一針一線做出來，動物嘅皮過咗咁多年仍然可以穿上身，係一種好特別強烈的感覺。」

「舊的物件可以將一個人的性格鮮明地帶出來，這是圖像學，例如我穿一件四五十年代嘅皮褸，可能想比人的感覺是一個略為反叛的人，如果穿上biker jacket，就代表可能鍾意夾band、玩車，我好多時會買軍look嘅舊衫，都係同一個道理，五、六十年前嘅軍人經過好多刻苦訓練，着過嘅衫亦都帶出一種味道。」

嗜好多多的鄧梓峰，除了做司儀還演電視劇，多數是正派健康角色，他也希望有新嘗試，他說不是刻意為自己鋪路，「電視電影呢行，你一定形，人地就永遠搵你做某類角色，因為對你有信心，唔使再花時間去諗，但其實我唔係太喜歡自己定了一個形象，唔係好鍾意做太正氣的角色，我覺得做藝人應該係全面，有好多唔同的探索，咁先至有趣，所以我好感恩有幾個監製搵我做啲好唔同的角色，例如一些奸角，小人咁，肯咁樣去用我我係好開心。」

爸爸白手興家全靠好奇心

講到好奇心，他笑說父親鄧廷琮的好奇心比他大得多，他亦深受爸爸的言行所影響，「他真是一個腳踏實地的生意人，絕對係，他不會好放膽去投資金融產品，甚至乎買樓都好保守，所以我媽咪成日話佢，如果你買多啲樓就好啦，但無就無㗎啦。但他有一樣嘢啟發我好深的，就是他的好奇心，他原籍貴州，49年先落到香港，二次大戰時住在貴州，我記得佢講過，他瞓喺草地上，每一次見盟軍轟炸機飛去炸日本仔，應該在四川重慶起機，經過貴州飛去，他就好好奇，美國嘅科技點解可以咁犀利，可以一批一批轟炸機飛過去，隔一個小時又飛回來，有時又少了幾架，希望將來睇下呢個國家係點。」

「到50年代他到了香港，好辛苦做咗幾年嘢儲了點錢，就真的貿貿然坐船去美國讀大學，睇呢個世界，佢呢種心態好影響我地幾兄弟。」鄧梓峰是孻仔，大哥鄧小宇是《號外》雜誌創辦人兼作家，二哥鄧小宙替家族打理生意。

鄧廷琮後來創辦航運事業，白手興家，在美國及加拿大都有分公司，家人亦相繼移居加拿大，「他覺得一個地方，航運一定需要，點解呢，因為起鐵路不是一下子起到，但一條跑道可以容易建立出來，所以他覺得飛機的航運有得發展，之後一直做航運，後來做埋海運，他獅子會又做到成個區域的總監，又是好投入，因為這些對佢都是好好奇的事物。」

鄧廷琮生前更成立教育基金，重點資助貴州貧困家庭的優秀子女完成大學學業，希望他們努力走出國外學習更先進的知識，相比起爸爸的生意頭腦及遠見，鄧梓峰不敢自誇，不過他在香港也成立了教育商業機構，教小朋友入學面試技巧，培養孩童講說話的自信心，「演藝係我主要的收入，辦教育當然有利潤，但主要是建立口碑，做意義的事最緊要，而家細路仔個個都係低頭族，希望佢地夠膽望住人講嘢，細路仔望住電話玩當然開心，但放低電話，都夠膽對住人，好清晰表達自己心裡所想，已經是好成功的一步。」

行山減壓睇笑片要識幽默

為人父母，他也明白香港人為口奔馳，擔子不輕，可能連陪子女家人的時間也很少，「香港好多人面對好重的擔子，我覺得你幾重的擔子都好，係需要有個平衡的生活，work life balance，聽落去好似無咁可能，我知道有些人一日可能做好多份工，根本無時間去優閑，但就算係靜靜地比自己思考一下，或者relax一下，半小時，一小時，已經係好舒服。」

「你負擔得到可以玩一些運動和嗜好，如果無能力負擔，行山已經係好好的方法去減壓，行山唔使錢，香港有好多好靚嘅郊野公園，好多好靚嘅地方去紓緩一下自己，我覺得少少嘅空間係必需的，無論你做嘢幾辛苦，要比一個break自己，抖一抖，這是很重要。」

他雖然被人稱為輕輕鬆鬆鄧梓峰，但一樣有哀傷失意時，「我地呢行有起有伏，睇下你識唔識得將情緒轉化，例如遇到低潮位、失意嘅時候，就趁個段時間去學其他事情，去分開自己專注力，我有時會去學下德文法文，去學下小型飛機，學潛水，有嘢分開自己注意力是好的，好過去鑽牛角尖。」

另一種解憂良藥，是要懂得幽默，好似有人覺得他似巴斯光年，他亦欣然接受，「我好鍾意我啲細路有幽默感，所以好細個就鼓勵佢地睇多啲笑嘅電影，睇多啲漫畫，好笑嘅電影唔一定要睇新的，差利的電影其實都好好笑，係一種幽默感，用另外一種角度去睇同一樣嘢，佢地細個睇好多差利、三傻嘅電影，等佢地識得笑，嘰嘰呱呱，始終係開心啲好。」

撰文：黎明輝

攝影：廖健昌

-----------------------------

【你爆料，我課金！】

爆相：$500　 爆片：$1,000

分清黑白 壹齊揭穿社會黑幕！

詳情： https://s.nextmag.hk/e/zg7VUk287Z

-----------------------------

【壹週刊Telegram，與港人同行，每日為你推送抗爭現場實況】

一手報料：https://t.me/nextmaghk

最新消息：https://t.me/NextPlushk

-----------------------------

【升級壹會員登記站 為你解疑難！】

沙田、旺角、荃灣、觀塘、銅鑼灣5區為你服務

詳情： https://s.nextmag.hk/e/Tssefy687Z