近年致力喺荷李活發展銀色事業嘅章子怡，早前被本報踢爆佢同霍啟山分手，聽講話佢兩個因為經常分隔兩地，令感情轉淡。嗰頭鬧情變，日前美國就有消息話啱啱喺本屆奧斯卡憑《Hustle&Flow》提名影帝嘅三十七歲黑人男星泰倫斯侯活（TerrenceHoward）向章子怡施展猛烈追求攻勢，據聞章子怡仲好受落㖭！

吟詩調情

據美國《紐約日報》報道，泰倫斯侯活喺三月初嘅奧斯卡電影頒獎禮上同章子怡初相識，繼而一見鍾情，仲立即交換電話。喺過去一個月裏面，泰倫斯不停約會章子怡，結果個零月已經約會咗幾次。
泰倫斯嘅老友仲爆料話，佢次次同章子怡約會後，總係滿口「Ziyi」（章子怡）、「Ziyi」，而且鍾情文學嘅泰倫斯仲特登為女方吟詩調情，搞到啲老死個個都話頂佢唔順。
《紐約日報》記者曾經打電話向泰倫斯嘅經理人求證，但對方點都唔肯認，至於章子怡嘅發言人就以一句「唔係事實」嚟回應。雖然有傳霍啟山身邊出現咗一位紅顏知己，𠵱家睇嚟章子怡都唔寂寞啦！