莫文蔚喺《食神》嘅「火雞姐」造型，刀疤眉、鴛鴦眼、暴龍牙，真係唔係個個女星都接受到，仲有趙薇喺《少林足林》扮演醜女「阿梅」角色，同樣都係咁經典，呢個就係周星馳電影嘅魅力，似乎可以拍到星爺嘅電影，就算幾大牌嘅女星，都會甘願放棄靚靚形象！

不過，原來高高在上嘅星爺，都曾經試過被女星拒絕，呢位夠膽向星爺say no嘅女星，就係－－劉嘉玲。

嘉玲姐日前接受大陸節目《一路書香》訪問，自爆曾經拒絕星爺要佢一邊噴飯一邊講對白嘅要求！嘉玲姐同星爺於96年曾合作電影《大內密探零零發》，主持問嘉玲姐同星爺拍戲嘅時候，會唔會經常因導演要求太高而NG？嘉玲姐用國語表示：「不會，我們合作得非常愉快。我跟他相處挺好的，而且他非常的尊重我，他每次都是，很老遠見到我就90度鞠躬，『嘉玲姐』，我說你不要這樣有禮貌好不好。」

嘉玲姐坦言同星爺合作輕鬆愉快，仲讚星爺有好多爆笑點，因為星爺喺現場好多時都唔跟劇本拍攝，最鍾意即興演出。嘉玲姐自爆：「我拒絕了他一個鏡頭，就是他要我一邊噴飯一邊講對白，我說：『周星馳，我不玩這個。』他說：『很好笑的，每次都很好笑。』我說我不玩這個，我不是個喜劇演員，他最好是你一邊流着鼻涕，或者一邊噴飯一邊講，我說這個不行。」

當年拒絕邊噴飯邊講對白嘅無厘頭演繹要求，但時移勢易，依家嘅嘉玲姐變得豁達同好玩得，佢在節目中隔空向星爺喊話：「但是現在我可以了，如果周星馳你現在找我來拍，我可以了。」

網民都留言：「哈哈哈哈，太可愛了嘉玲姐，形象重要，哈哈哈！」、「嘩啦啦，嘉玲姐真的很霸氣了，喜歡喜歡。」、「一邊噴飯，一邊喊對白，好有畫面感。」

精選娛聞，喺晒《娛果》
http://fb.com/appledailyent