雙普選一拖再拖，煲呔又亂噏扮代表，市民對呢個政府真係忍無可忍，所以32度高溫都有數以萬計市民上街！去到政府總部，大家終於忍唔住，集體「冲擊」政府總部，出現相信係開埠以來最震撼當街小便場面。

「拎出嚟即刻拉你」

自古以來都係官迫民反，前日遊行人士要當街小便，都係為勢所迫。當晚約200人堅持留守政府總部要求見煲呔，遊行人士飲咗唔少水解渴，自然有生理需要解決，現場消息稱，有人向警員借用政府總部廁所，希望阿Sir行個方便，點知遭一口拒絕，市民話若忍唔住就要就地解決，手部剛剛有動作，阿Sir就嚴厲警告：「你夠膽拎出嚟，我即刻拉你！」
屙篤尿都要拉要鎖，一般市民梗係唔敢以身試法，嚇到即時縮回，差佬咁無良，在場嘅長毛率先公民抗命，就在花槽旁解手，其他人見狀紛紛埋位，一陣輕鬆歡呼聲隨即響起，人民力量浩浩蕩蕩勢不可當，見到如此壯觀場面，警方亦不敢輕舉妄動，冇採取行動。
正常成年人每次小便大約排出300至500毫升液體，以當日有約20人集體小便計，保守估計最少留下6公升尿液。人民爭取普選嘅汗水不會白流，八方相信，大家嘅尿液都不會浪費，假以時日，獲7.1遊行人士灌溉滋養嘅民主之花，必定會在政府總部開得很燦爛。

港府考慮以尿入罪

根據法例，喺公眾、冇掩地方或其他不適當地方大小便屬違法，可被判罰款500元及監禁3個月，因此忍無可忍冲擊政府總部人士，隨時被秋後算賬！行政署話如果搜集到更多資料關於有人喺政府總部外便溺，政府會考慮跟進事件。咁講法，即係警告大家，出得嚟屙，後果坎坷。被指帶頭嘅長毛有頭有面，最有可能被檢控，八方奉勸港府萬勿「以尿入罪」，否則隨時激發更多人冲擊政府總部，甚至水淹禮賓府！
幾十個人小便，未至於令政府總部水浸，不過有人噚日返工時，就不自覺掩鼻而行，亦有人話好似有陣味。八方相信係心理作用，因為食環署已派人洗刷乾淨，見證歷史嘅味道，隨水而逝。

mailto:[email protected]