「大劉」劉鑾雄日前喺多份香港報章頭版發聲明宣佈同呂麗君已於前年分手、斷絕關係（新聞連結： http://bit.ly/2eUGlwJ ），其後輪到呂麗君發聲明，更以「老公」稱呼大劉（新聞連結： http://bit.ly/2gq58iD ）。

「劉呂」關係成近日城中熱話，自然吸引傳媒追訪，喺今日下晝1點幾，於大劉位於白建時道12號大宅內，見到佢同呂麗君所生嘅女、現年14歲嘅秀盈現身。

儲一頭長直黑髮、身穿公仔print tee襯牛仔短褲嘅秀盈，喺5至6名隨行人員陪同下，於大宅內放狗。隨行人員有人攞定膠袋，相信係預備幫秀盈隻愛犬執屎，另有人幫狗狗拎住水兜，另有數名專職「陪跑」嘅人，陣容好大陣仗吓。

行咗兩個圈，秀盈見到大宅外有好多人喺度影相，愕一愕然，之後就行側門快速返入大宅。