有指張學友明年會舉行入行30年演唱會，甚至內地淘寶網出現訂飛消息，不過學友今日喺台北新碟發佈會上呼籲樂迷要小心啲，佢話到目前為止，佢未決定會做騷：「你都知我如果未確定，我係唔會做，無論如何，0依家想睇我演唱會，等我開記招，我出嚟講（開騷），先係真實，網上手法層出不窮，會呃你，我唔知佢收咗你錢點處理，我演唱會都未有，收咗錢咁點呢？....我覺得樂迷要小心。」

學友續說：「（呢啲情況）唔止發生喺我身上，有歌迷成個月唔食飯而要上網訂飛，但最後冇咗（飛），啲人走咗路，都可以咁樣發生。」

學友揚言若開騷，一定會開記招，又話都夠時間訂飛：「我開時都係啱啱籌備，時間一定夠，唔使件事未發生，但畀人呃咗﹑同益咗佢都唔好，我覺得咁樣唔抵，為乜嘢呢？」

咁係咪有計劃開騷？學友話：「有諗住下年，但我未諗到嘢，同邊個做未決定。」至於會否任《我是歌手3》做嘉賓？學友再三強調：「冇聽到，我亦都唔做，我之前推咗咁多，我0依家無端端做，對其他唔公平，哈林有叫過會唔會上去，我話自己唔係好舒服，唔知點做，冇乜把握，所以唔會發生呢件事。」