內地女星白百何同歌手組合「羽泉」成員陳羽凡結婚11年，兩人育有9歲兒子，噚日內地傳媒驚爆33歲嘅白百何疑背夫偷食，被影到同小鮮肉喺泰國酒店泳池蜜會，兩人懶理有助手在場，唔單止面貼面講悄悄話，仲互相潑水調情嬉戲，小鮮肉更出現「動L」生理反應，白百何疑似用手指篤佢嘅下體，令人譁然。
事件曝光後，小鮮肉火速被人肉起底，有傳佢係內地模特兒張愛朋。對於白百何疑似出軌，有內地傳媒嘗試聯絡佢同陳羽凡，白百何嘅宣傳總監唔聽電話、唔覆微信，羽泉經理人則表示：「不方便替藝人回應這個事情。」至於內地「名偵探趙五兒」發微博聲稱，白百何夫婦現已協議離婚。

前日冧講老公

憑電影《失戀33天》走紅嘅白百何，曾傳介入阮經天同舊愛許瑋甯嘅戀情，近年屢傳跟老公爆離婚，有網民發現兩夫婦喺去年8月互相取消關注，惟前日白百何出席活動仍將老公掛喺嘴邊，仲暱稱老公為「我家陳老師」晒恩愛：「我們家陳老師是個藝術家，比較安靜，喜歡窩在工作室裏。」
撰文：馮仁昭