大摩馬房連贏七個賽日，最大功臣非波健士莫屬。

剛周三（13日）谷戰，波健士幫摩廐爆咗隻「美麗歡欣」（29倍）保住勝纜。

周日（17日）田戰大摩共派七駒上陣，只有兩駒交由波健士操刀，第一場「友瑩利」和第六場「精靈勇士」上仗皆不入前五名，近績似乎麻麻。

但翻查騎練今季合作共獲四Win，全部頭馬上仗皆不入前五名，因此上述四駒賠率均有10倍或以上，大家千祈咪俾近績差嚇到！

第一場五班2200米「友瑩利」，轉摩廐後跑過三仗，近兩戰千八米也姍姍來遲，查實走勢唔差，遲熟長途馬加程更合腳法，有權突如其來。

第六場三班1000米「精靈勇士」，上仗配潘頓初跑同程，只得6.5倍飛數不弱，陣上太重口有前無後跑第七，復課已斂口有進步，打王牌等番同程才跑，可由蟲變龍出冷。