內地城市好多人喺股海淘到唔少金，人人有股炒；但喺偏遠農村，依然未能做到人人有書讀，滙豐集團主席葛霖同滙豐亞太區大班鄭海泉噚日北上京城，趁滙豐中華慈善基金10周年，做番件好事賀壽，代表滙豐中華慈善基金捐咗550萬人仔，幫一班農村兒童，等佢哋可以受教育，同埋發展有關項目。

3年培訓800農村教師

過去10年，滙豐透過呢個慈善基金，捐咗成2500萬港元，資助120幾個慈善項目，有超過10萬人受惠。但有調查資料顯示，喺邊遠貧困地區，農村小學仍然只有不到10%嘅老師係本科畢業生，好多老師其實只得中學畢業。
所以今次嘅捐款，目標係未來3年內，培訓800多個農村小學教師，同城市流浪兒童管理中心工作人員，又為多家貧困小學同收容中心添置學習設施，希望會有超過40萬個兒童受惠。