常見玩電單車的車友，多有紋身，特別是那雙手，不禁好奇：玩電單車必定要有紋身嗎？「紋身未必關電單車事，你可以話揸電單車的人，多數會有紋身。」電單車友兼紋身師Jel Chan一邊手紋上傳統的日本風，另一邊手是寫實的黑灰。當他駕着座駕Chopper時，尤其搶眼。

客製電單車 1,340cc車齡逾20年
「Chopper其實是哈利其中一個種類，一部完全客製的電單車。」他的Harley-Davidson Chopper有1,340cc，整車師傅從它身上的零件估計，車齡起碼超過20年。「以前睇好多《American Chopper》節目講點改車，都係買車架、再買零件回來自己砌。」他那部Harley-Davidson Chopper，看一眼必記得，極長頭Fork，車身又長。「我呢部好似係8呎長。」

特別與舒適從來不能並存，Jel的Chopper亦然。「硬架，冇避震機，得頭fork。揸起上嚟，你會感到好震。冇辦法，你要有型，就一定要唔舒服。」記得到車日，他第一時間跳上車，畢竟美國人身形與亞洲人有頗大差別，腳踏位差點，揸回家又是另一噩夢。「由西貢揸返屋企，嘩，好似唔係好啱。」雖然極短路程，與日常的車速無異，只是一直震動的車身，令他的膊頭與手臂似是做過劇烈運動一樣，痠痛得要命。

「你冇得放棄，試吓先。」

改座位遷就腳長 最愛揸公路
首要解決的是座位，着師傅推高一點，腳才能踩到煞車掣。至於避震那關，他說習慣就好了。用了近兩個多月，才能熟習這車。「揸法是差不多，都係要瞓落去。轉左彎好舒服，因為左邊車身重，會自己跌下去；反而右彎，就要有力踩下去像搬動部車一樣。」急彎得減速，大概時速20至30公里入彎已是極限。最怕的是U-turn，是車身過長的煩惱。「我的車是1,340cc，都好大力，但因為坐姿問題，揸唔到極速，那坐姿很『食風』，差不多時速100公里已經想收慢。」

說着說着，似是數它多過愛它。不過，正是了解透徹才選擇留下，這才是真愛。「最享受的畫面，當然是在高速公路，因為又唔震，又舒服，有時我伏住揸，因為輪闊所以好穩定。」也喜歡車的形狀，即使多年過去，設計還未過時。哪怕是雨天不能出車的日子，到車場看一眼也很滿足。

「人生成日諗想做，但又唔去做。車買返嚟，起碼叫擁有過、揸過。我就越嚟越鍾意，點都唔會賣，玩一世，留畀阿仔。」

採訪：梁苡珊
攝影：高梓軒
導演：倫星揚
編輯：鄒仲安

-----------------------------
成功個案經驗之談 融入台灣資訊大合集
《移居台灣手冊》尋找安樂窩
-----------------------------
中西醫教你急救「口罩肌」後遺症　全面擊退面油口罩瘡
《保健精讀：急救口罩肌》 還原靚靚肌
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新