立法會嘅上海世博團未起行先有風雨，唔止泛民主派陸續表明冇乜興趣，就連建制派陣營都好似有啲唔睇好。身兼內會主席嘅自由黨主席劉健儀日前都質疑，呢個世博建議只不過係立法會主席曾鈺成同中聯辦官員閒聊時傾到啫，暗示唔係正式提出，大家唔使咁緊張。

堅信彭清華唔會亂噏

曾主席噚日出席一個公開場合時親自解畫，話同佢傾呢件事嘅人，正正係中聯辦主任彭清華，引述當時彭清華一口答應話「好呀，會積極協助」時，其他中聯辦副主任都在場「見證」，反問唔通咁都只係算閒聊？
其實彭清華早前已經公開表明，話正就議員北訪積極跟進，曾主席對彭主任信心十足，拍心口話彭清華唔會「亂噏」，一定講過算數，更加表明呢個團百分百會成行。不過，就有一個前提囉，就係記者唔好「唱衰」個團。吓，咁樣又關記者事？原來曾主席意思係話，記者唔好成日逼啲議員就個團「講乜講物」，要畀啲空間畀議員喎，佢強調如果冇人再「唱衰」，各位記者都可以執定行李等上飛機。