T.V. Carpio早前接受訪問,歌精舞藝強樣樣掂,她用小時候穿過的衣服,從新做衫來影相,亦曾為母親杜麗莎的演唱會設計歌衫、小時候已踏上紅館台板兩母女合唱。而她的成就,杜麗莎也為女兒驕傲,T.V. Carpio憶述有次演出後母親的反應:「當大家企喺台上鞠躬謝幕,媽咪突然衝上台前,喊住同觀眾講:She is my baby,she is my baby。」年輕人常感慨沒錢買樓,T.V. Carpio也有同樣願望:「想養番媽咪,以前佢住廣播道,佢話第一次買樓係14歲,買俾佢父母。點解我幫唔到媽咪買樓,我係想嘅,佢話o依家時代唔同,但我係想,回報番俾佢,賺多啲錢俾媽咪買樓。」性格爽朗的她說到此時不斷流淚。
經常被外人和母親讚唱歌好,但T.V. Carpio以前怕與母親合唱:「好緊張,壓力好大,總係覺得未準備好,點解仲可以上台唱,有權可以一齊唱,睇番舊片段會尷尬,但o依家好享受合唱,想有多啲回憶。」工作上有時都會碰釘,會氣餒,T.V. Carpio自言曾想離開演藝界,都靠杜麗莎的鼓勵:「好多時我想quit唔想做,我唔夠好,好似冇進步、冇行前,做咗百老匯但why so struggle,但媽咪會話:no!you have to keep going,佢好支持我,俾好多信心。」從小杜麗莎就灌輸要認真的性格,T.V. Carpio笑言以前曾以為媽咪不想自己快樂:「媽咪覺得喺美國做亞洲人,唔可以求其。成日話做人唔可以太relax、太舒服,學唱歌、畫畫學語言就任我做,但唔會俾好多機會我出去玩。之前想同一個朋友合作,但意見唔同,我話好唔開心,媽咪話唔好理佢,佢話T.V.你係artist,artist係冇朋友。」