麥潔文同53歲嘅老公江華，結婚24年，經歷大大小小風雨，0依家全力培育女兒陳薔天（天天）進軍樂壇做歌手。兩口子噚日下晝四點幾，撇低一對仔女，穿上全黑色情侶裝拍拖到圓方嘆下午茶。

比劉華更姿整嘅江華，戴上黑色帽，穿上短boots加吊腳褲扮後生，全程拖實太太麥潔文隻手揈來揈去，好有天真feel。兩人一前一後行入一間西餐廳，江華又輕撘太太膊頭，由天真一下子變番老夫老妻。

兩公婆難得浪漫撐枱腳，不過麥潔文似有下場趕時間，所以食得好匆忙，大大啖食完一碟意大利粉後，未夠一小時便先行離去；反而江華呢，就他他條條，留喺餐廳繼續hea。

江華多年來受軟骨壓住神經煎熬，未知是否因為神經痛，唔可以坐太耐，所以見佢好多時間都係企住食，而且比起老婆，江華進食速度明顯慢好多，更食不露齒，保持禮儀。佢似乎係該餐廳常客，閒著無聊時會同侍應傾偈，見佢講嘢嗰陣起晒手表情多多，非常精靈。

雖然個lookkeep住young，但始終年過半百，難免老花，見佢睇手機同睇書嗰陣都要先戴番副眼鏡，逗留到晚上7時多仍未離開。

究竟江華平時嘅生活係點過嘅呢……