鬼妹仔性格嘅薛凱琪（Fiona）早排入鄉隨俗，去咗元朗八鄉揀桃花，仲圍住桃花轉圈準備雞年行桃花運。

桃花運唔係一定係姻緣，Fiona話娛樂圈人桃花運好緊要：「桃花旺即係人緣好同旺，唔一定係講愛情。」今次仲畀佢咁好彩搵到棵已經畀禮賓府訂咗嘅桃花王，唔執輸嘅Fiona即刻圍住棵桃花王轉咗幾個圈，寫咗兩張以英文加公仔寫成嘅fusion揮春，仲好似解簽咁講解當中含意，佢話：「第一張隻龜圖案，係『閨』嘅諧音，隻襪即係『密』字，意思係電影《閨密2》大賣，第二張仲明顯，係希望今年出嘅國語碟大賣。」

講到今次可以咁好運，率先近距離接觸到禮賓府嘅桃花，Fiona話：「咁17年就會好多桃花嘞，工作上嘅桃花我係想要嘅。雖然我唔睇相，但都知愛情上人係唔需要桃花，需要姻緣。愛情唔需要咁多，有姻緣就夠嘞。」問到佢係咪因為有咗固定男友．所以唔駛咁多桃花，佢話唔係：「唔係因為有姻緣，係因為真正嘅愛情畀你咁多揀做乜啫，上天注定一個就夠。」Fiona話仲等待緊喎，咁上年同佢一齊去睇戲個位馬主男友Byron Tang鄧浩基，算唔算係揀定呢？（新聞連結： http://bit.ly/2hk25qS ）