星期六，除咗行街食飯睇戲，仲有唔少人會留嚟做家庭日。好似郭羨妮（Sonija）咁，今日佢喺微博貼咗4歲囡囡Kylie嘅相，相中Kylie放咗手板喺枱面，再嗲嗲哋咁瞓咗個頭上去，Sonija留言話：「想起我們都掛念的人」，仲tag埋導演老公朱少杰，冧到爆！

另一邊廂，蔡少芬（Ada）喺微博貼咗兩個囡囡楚兒同信兒拉筋照，Ada留言話：「人生……是不斷的要付出、鍛鍊、吃苦！才會成熟、美麗、進步！當你努力不懈……人生才不枉過！」見到佢哋兩個做得有板有眼，睇嚟佢哋平日喺屋企應該都訓練有素，先有咁嘅效果。

而湊仔晒女唔係女士嘅專利，無綫前新聞王子柳俊江（柳爺）亦喺Instagram貼咗囡囡Bella食西瓜消暑嘅得意樣，但最正嘅係柳爺寫嗰一篇文，佢其中提到：「眼利的小朋友，經常在地下執塵，最愛和爸爸玩「捉蚊遊戲」，四圍搵蚊比爸爸捉。（中略）最開心嘅，係佢越來越跟爸爸了，經常要攬住我瞓。好想時間停止在這一刻呀。」

最重要係最尾嗰句「經常被囡囡攬住瞓」，真係出面個太陽都唔夠柳爺咁晒呀……有女萬事足……