旗下馬主100歲大壽 告達理精心炮製賀禮!
告達理馬來之珍陳偉南
練馬師告達理今季因為本身健康及其他問題拉低成績,目前仍未達標,但論工作熱情,相信冇乜邊個會懷疑佢。
今日(18日)沙田日馬,告達理只出兩駒少少哋,第六場三班1800米草地賽的「閃電王」,評分已跌穿上季勝時,計數固然有餐士;而第二場五班1800米草地賽之「馬來之珍」若贏到嘅話,更加有意義。
原來「馬來之珍」馬主陳偉南不久前100歲大壽,告達理梗係好想贏番場,當做賀禮。隻馬雖已八歲,但仍連續兩次得第三都算唔錯,好似馬主咁老當益壯,今次小休個半月再來,儲足體力,隨時馬到功成!